ဗြိတိန်နိုင်ငံသား တစ်ဦး၏ ဦးနှောက် အတွင်းသို့ ပင်မဆဲလ်များ သန်းနှင့်
ချီလျက် ထိုးသွင်းပြီး လေဖြတ်ခြင်းကြောင့် ဖြစ်ပွားခဲ့သည့် ဦးနှောက်
ပျက်စီးမှုကို ပြင်ဆင် နိုင်ခဲ့ကြောင်း သိရသည်။ ယင်းကဲ့သို့ ပြုလုပ်ခြင်းမှာ
ကမ္ဘာ့ ပထမဆုံး အဖြစ် ကုထုံး အသစ်ကို စမ်းသပ်ခြင်းလည်း ဖြစ်ကြောင်း သိရသည်။
လာမည့်လ အတွင်း ပျက်ကျ သွားသော ကလေး တစ်ဦး ထံမှ ရရှိသည့်
ပင်မဆဲလ်များဖြင့် အလားတူ ကုထုံး များကို အသုံးပြုကာ အခြား လူနာ ၁၁ ဦးကို
ထပ်မံ စမ်းသပ် ကြည့်ဦးမည်ဟု ဆိုသည်။ သုံးလ ရှိသည့် သန္ဓေသား တစ်ဦးမှ
ရရှိသော ဆဲလ်များသည် လူနာပေါင်း သိန်းနှင့် ချီလျက်ကို ကုသရန်
လုံလောက်သည်ဟု ဆိုသည်။
သို့သော် ဝေဖန် သူတို့က မမွေးဖွားရ သေးသော ကလေးငယ် တစ်ဦး၏ အသက်ကို ဆေးဝါး
ထုတ်လုပ်ရေး စက်ရုံ တစ်ခု အဖြစ် အလွဲသုံးစား ပြုခြင်း ဖြစ်သည်ဟု ဆိုကာ
ဝိုင်းဝန်း ကန့်ကွက် နေကြသည်။ ဗြိတိန်နိုင်ငံ ဂလက်စဂိုးမြို့ တောင်ပိုင်း
အထွေထွေ ဆေးရုံမှ ဆရာဝန်များနှင့် ဆာရေးမြို့ အခြေစိုက် ဇီဝ နည်းပညာ ကုမ္ပဏီ
ReNeuron မှ သိပ္ပံ ပညာရှင်များနှင့် ပူးပေါင်းကာ အဆိုပါ ကုထုံးကို
ဆောင်ရွက် နိုင်ခဲ့ခြင်း ဖြစ်သည်။ အထူးဆဲလ် အမျိုးအစား အဖြစ် ကွဲပြားခြင်း
မရှိသေးသည့် ပင်မ ဆဲလ်များသည် ခန္ဓာကိုယ် အတွင်း ပျက်စီး နေသည့်
တစ်သျှူးများကို ပြင်ဆင် နိုင်ကြောင်း သိရသည်။
ဦးနှောက်ထဲသို့ ပင်မဆဲလ် တစ်ကြိမ်သာ ထိုးသွင်းရုံဖြင့် လေဖြတ်ခြင်းကြောင့်
ဦးနှောက် ပျက်စီး နေသူကို စကားပြောခြင်း၊လမ်းလျှောက်ခြင်းနှင့်
မှတ်ဉာဏ်များ တိုးတက် ကောင်းမွန် လာစေသည်ဟု ဆိုသည်။ အသက် ၆၀ ကျော် အရွယ်ရှိ
ကုန်တင်ကား ဒရိုင်ဘာ တစ်ဦးသည် လွန်ခဲ့သည့် ၁၈ လက စ၍ လေဖြတ်ခြင်း ဝေဒနာကို
ခံစားရခြင်း ဖြစ်သည်။ သူ့အား စမ်းသပ် ကုသမှု အဖြစ် ပါမောက္ခ ကိတ်မား
ဦးဆောင်သော အဖွဲ့က ကုထုံး အသစ်ဖြင့် စမ်းသပ် ကုသ ပေးရာမှ အောင်မြင်
ခဲ့ခြင်း ဖြစ်သည်။
No comments:
Post a Comment