အောက်တိုဘာလ ၂၂ ရက်နေ့က မြန်မာနိုင်ငံကမ်းရိုးတန်းကို စတင်ဖြတ်ကျော်ခဲ့သော အားအလွန် ကောင်းသည့် ဆိုင်ကလုန်းမုန်တိုင်း ဂီရိကြောင့် ရခိုင်ပြည်နယ် ကျောက်ဖြူမြို့နှင့် စစ်တွေမြို့တို့တွင် ပျက်စီးမှု နည်းပါးခဲ့ပြီး မြေပုံမြို့နယ်တွင်မူ ထိခိုက်ပျက်စီးမှု များပြားခဲ့ကြောင်း မြေပုံမြို့နယ်မှ ပေးပို့သော သတင်းများအရ သိရှိရသည်။ ရခိုင်ပြည်နယ်အတွင်းရှိ ကျောက်ဖြူ၊ ရမ်းဗြဲ၊ မာန်အောင်၊ အမ်း၊ ပေါက်တော၊ မြေပုံ၊ ပုဏ္ဏားကျွန်း၊ စစ်တွေ၊ မင်းပြားတို့တွင် မုန်တိုင်း သက်ရောက်မှုများကို ကြုံတွေ့ခဲ့ရပြီး အောက်တိုဘာလ ၂၄ ရက်နေ့အထိ ရရှိသော သတင်းများအရ မြေပုံမြို့နယ်မှာ ပျက်စီးဆုံးရှုံးမှု အများဆုံး ဖြစ်ခဲ့ကြောင်း၊ အခြားမြို့နယ်များတွင် ပျက်စီး ဆုံးရှုံးမှုများစွာ မရှိခဲ့သော်လည်း အစားအသောက်ကဲ့သို့သော အရေးပေါ် အကူအညီများ လိုအပ်လျက်ရှိကြောင်း သိရှိခဲ့ရသည်။ လောလောဆယ်တွင် ဒေသခံများနှင့် အဆိုပါ ဒေသတာဝန်ရှိသူများမှ လိုအပ်မှုအချို့ကို အကူအညီပေးနေကြောင်း သိရသည်။ “စစ်တွေမှာ သစ်ပင်တွေပဲ လဲတယ်။ ထိခိုက်မှု သိပ်မရှိဘူး။ ကျောက်ဖြူကလည်း ထိခိုက်ပျက်စီးမှု နည်းတယ်။ မြေပုံကတော့ ၉၀ ရာခိုင်နှုန်းလောက် ပျက်စီးနေတယ်။ လူနှစ်ဦးသေတယ်”ဟု ဒေသခံတစ်ဦးက အောက်တိုဘာလ ၂၄ ရက်နေ့ နံနက် ၉ နာရီခွဲခန့်တွင် ပြောကြားသည်။ မြေပုံမြို့နယ်မှ နောက်ဆုံးရရှိထားသော သတင်းများအရ မြေပုံမြို့နယ်အတွင်းရှိ ကျေးရွာများအနက် အမျက်ထွက်၊ ရွာသစ်၊ ကျီးခေါင်းတောင်၊ ပြိုင်းချောင်းနှင့် ပြင်ဝန်း စသည့်ကျေးရွာများတွင် လူ ၁၀ ဦးကျော်ခန့် သေဆုံးခဲ့ကြောင်း သိရသည်။ ထို့ပြင် သေချောင်း၊ ကုန်းဘောင်၊ ပြိုင်ချောင်း၊ အမျက်ထွက်၊ ရွာသစ်၊ ကျီးခေါင်းတောင်ကျေးရွာများတွင် ထိခိုက်ဒဏ်ရာ ရရှိသူများလည်း ရှိကြောင်း ၂၀၁၀ ခုနှစ် အောက်တိုဘာလ ၂၇ ရက်နေ့ထုတ် Weekly Eleven ဂျာနယ်တွင် ဖော်ပြထားပါသည်။
No comments:
Post a Comment